Një ngjarje e paprecedentë ka ndodhur në Itali, me një 48-vjeçar, i cili shfrytëzoi në maksimum ngjashmërinë e tij me Andrea Pirlon, duke vjedhur disa dyqane të shtrenjta.
Siç raporton gazeta “La Repubblica”, 48-vjeçari Alesandro Palaccolo, i cili ngjasonte jashtëzakonisht me Pirlon, mashtronte pronarët e dyqaneve, duke marrë produkte të shtrenjta, pa paguar.
48-vjeçari prezantohej si Pirlo dhe zgjidhte të mashtronte dyqanet më të shtrenjta të Torinos, Napolit dhe Breshias.
Ai merrte çfarë dëshironte dhe partnerja e tij 42-vjeçare, thoshte se Pirlo do të vinte të paguante më vonë.
Ngjashmëria e këtij personi me Pirlon ishte kaq e madhe sa që dallimi nuk mund të bëhej lehtë.
Pronarët e dyqaneve bënë kërkimet e tyre, pasi faturat nuk u paguan kurrë dhe verifikuan se kishin rënë pre e një mashtrimi të madh.
Policia ka nisur kërkimet për 48-vjeçarin, i cili ka pasur një ide gjeniale për të jetuar lehtësisht.
