Pavarësisht bllokimit të merkatos dhe pamundësisë për t’u përforcuar, trajneri i Chelseat Frankie Lampard ka “djegur” dy mesfushorët e skuadrës, Tiemoue Bakayoko dhe Danny Drinkwater, duke u bërë të ditur se nuk i ka në planet e tij.
Tekniku i emëruar vetëm këtë verë në stolin e londinezëve u ka kërkuar dy mesfushorëve të gjejnë sa më shpejt një tjetër sistemim, nëse nuk duan të kalojnë sezonin mes stolit dhe tribunës, pasi nuk i sheh si titullarë në formacionin e tij.
Që të dy futbollistët kanë kontratë deri në verën e vitit 2022 me Chelsean, por largimi i Bakayoko pritet të jetë më i lehtë, pasi mesfushori francez vjen pas një sezoni mjaft të mirë te Milani dhe ka kërkesa në treg.
Ndryshe është situata e ish mesfushorit të Leicesterit, Drinkwater, i cili vjen pas paraqitjesh mjaft të dobëta dhe skuadrat e tjera mund t’i hapin derën maksimumi në huazim.
