Ivan Perisic do ta vazhdojë karrierën te Bayern Munich.
Kroati ka pranuar t’i bashkohet ish-trajnerit të tij në kombëtaren kroate Niko Kovac. Anësori kroat mund të konsiderohet si pasuesi i Franck Ribery në krahun e majtë të sulmit të bavarezëve.
Pasi i la në pritje për disa orë, Perisic vendosi ti thotë ‘Po’ Bayernit. Marrëveshja mes Interit dhe Bayernit mbi Perisic është arritur për një huazim 1-vjeçar për 5 milionë euro, me të drejtë blerjeje për 20 milionë euro verën e ardhshme. Perisic rikthehet në Bundesliga pasi më parë ka mbajtur veshur fanellën e Dortmundit dhe atë të Wolfsburgut.
Për të mbyllur sa më shpejt transferimin e 30-vjeçarit te Bayerni, Antonio Conte e nxorri jashtë planeve të tij kroatin dhe nuk e ka grumbulluar për sfidën e kësaj të shtune për trofeun Naranja që Interi do ta luajë në Mestalla ndaj Valencias.
