Jean Todt, presidenti i FIA-s (Federata Ndërkombëtare e Automobilizmit) ka folur sot për idetë e reja të pronarëve të Formula 1, për të shtuar numrin e garave. Ai ka kundërshtuar idenë për të çuar numrin e garave në 25, duke deklaruar se maksimumi duhet të jenë 22 gara.
“Një kalendar me 25 gara është i tepërt për Formula 1. Mendoj se ky është një proces shumë i gjatë dhe duhet durim. Ndaj, ne duhet të përqendrohemi te struktura aktuale, ajo me 22 gara, më e përballueshme edhe për pilotët”, u shpreh Jean Todt, që mbështet pilotët.
Liberty Media, kompania që zotëron aksionet e Formula 1, kërkon të rritë numrin e garave, duke u përhapur në pista të reja përveç atyre aktuale. Në rast se kjo gjë nuk ndodh ka gjasa që nga cirkuiti të largohen shumë pista legjendare, që nuk përballojnë dot kostot.
