Milani zyrtarizoi marrëveshjen me Zlatan Ibrahimovicin, por ekipi i “Djallit” do të ketë merkato dhe në dalje. Dy emrat që përfliten më shumë janë ata të Ricardo Rodriguezit dhe Susos. I pari nuk ka minuta, pasi Theo Hernandez po luan dhe do largimin. Watfordi ka shfaqur interes për të, por vetëm në formë huazimi. Milani nuk e pranon diçka të tillë. Kuqezinjtë duan ta shesin pa të drejtë kthimi.
Emri tjetër që ka dalë në listë është ai i Susos. Sulmuesi kërkohet nga Sevilla, por marrëveshja mes palëve mungon. 40 milionë euro është klauzola e lirimit për lojtarin. Milani kërkon të arkëtojë shifrën që në janar, por spanjollët nuk duan ta blejnë. Dy futbollistët janë me valixhe në duar, por ende nuk e kanë kaluar pragun e derës.