Kthimi i Zlatan Ibrahimovic me fanellën kuqezi dështoi ta frymëzonte Milanin drejt fitores, në të parën ndeshje të epokës së dytë të sulmuesit suedez në “San Siro”.
Skuadra e trajnerit Pioli barazoi 0-0 në shtëpi, të hënën, përballë Sampdoria, duke mos arritur të shënojë në tri ndeshje radhazi të Serie A.
38-vjeçari karizmatik e nisi lojën nga stoli, si zëvendësues. Ai u hodh në fushë në minutën e 55-të, në vend të Piatek. Me këtë rast, një fakt tepër interesant është plotësuar për Ibrahimovic.
Suedezi bëhet futbollisti, që ka luajtur mbi katër dekada në futbollin e nivelit të lartë; përkatësisht në vitet 1990, 2000, 2010 dhe tani, në vitet 2020.
Dekada e parë identifikohet me skuadrën e tij të vendlindjes, Malmoe. Dekada e dytë përfshin eksperiencat tek Ajax, Juventusi dhe Interi.
Dekada e tretë nënkupton fanellat e Barcelonës, Milanit, PSG, Manchester United dhe LA Galaxy.
Dekada e katërt nisi dje, me Milanin, në epokën e dytë të gjigantit suedez. Ky rrugëtim i gjatë e mbresëlënës nisi nga Malmo dhe vazhdon te Milani.
Ai u duatrokit e brohorit gjatë nga tifozët në “San Siro”, në minutën e 55-të, kur u hodh në fushë, por Milani nuk mundi ta gjente rrugën e golit edhe me të, ndaj një kundërshtari të dorës së dytë.
Në eksperiencën e tij të mëparshme në këtë klub, Ibrahimovic e ndihmoi Milanin të fitojë titullin e Serie A në sezonin 2010-2011. Ky është edhe trofeu i fundit i madh i kuqezinjve. Ai u transferua te PSG, në fund të sezonit vijues.
