Mesfushori i Manchester United Ander Herrera ka dalë si objektivi kryesor i AC Milan për merkaton e verës.
Spanjolli, megjithëse sezonin e kaluar ishte një nga më të mirët në mesin e fushës, nuk është aktivizuar shumë nga Jose Mourinho gjatë këtij sezoni, dhe ka nisur vetëm 8 ndeshje nga minuta e parë.
Tani Tuttosport pretendon se Milan, që aktualisht është në vend të shtatë të renditjes së Serie A, kërkon të marrë 28-vjeçarin.
Gazeta pretendon se klubi i Premier League nuk do të hiqte dorë kollaj nga mesfushori – por do të pranonte nëse do të vinte një ofertë rreth 35 milionë euro.
Milan pritet të shpenzojë sërish në merkato pas 200 milionë eurove të shpenzuara gjatë verës së kaluar. Ndërkohë edhe Mourinho po kërkon të formatojë skuadrën e tij në verë me Phil Jones dhe Chris Smalling që pritet të largohen në fund të sezonit.
Dyshja është paraqitur dobët gjatë javëve të fundit, dhe kjo u duk qartë në ndeshjen e fundit ndaj Newcastle, ku United humbi me rezultatin 1-0.
