Teuta dhe Tirana e mbyllin sfidën e sotme në barazim 1-1. Durrsakët dhe bardheblutë nuk arritën të vendosnin se cili do të ishte fituesi i takimit të sotëm në “Niko Dovana”, duke ndarë secila nga një pikë. Edhe pse Teuta ka vendosur një “rekord” me 8 barazime në 11 ndeshje, ekipi i Edi Martinit ngjitet në vendin e tretë pas humbjes së rëndë të Kukësit 4-1 me Partizanin.
Me mjaft mungesa, kampionët në fuqi të Tiranës u kujdesën më tepër të përfitonin nga gabimet e kundërshtarëve dhe të tërhiqeshin në prapavijë. Sulmuesi bardheblu Grent Halili zhbllokoi ndeshjen pas 3 minutash teksa kapiteni Renato Arapi nuk largoi një top të lehtë dhe Muçi përfiton duke pasuar te Halili. Ekipi i Martinit tentoi në vazhdimësi të barazonte, por sulmuesve u mungonte shënjestra. Duhej aktivizimi i Dejvid Kapllanit në minutën e 63-të për të barazuar takimin 7 minuta më pas.
Me rezultatin e sotëm, Teuta barazon me pikë Kukësin (17), ndërsa Tirana qëndron në vendin e gjashtë me 15 pikë duke u larguar akoma më shumë nga Vllaznia kryesuese.
