Edhe “Corriere dello Sport” e ka konfirmuar, ditën e djeshme se drejtuesit e Interit janë mbledhur për t’i prezantuar skuadrës një plan për pagesën e muajve korrik-gusht dhe nëntor-dhjetor. Në këtë mënyrë do të anashkalohet rreziku i penalizimit në klasifikim.
Brenda disa ditësh në llogaritë e futbollistëve do të derdhen dy muajt e parë, ndërsa pagesa e dy të fundit të 2020-ës, që në bazë të rregullores federale duhet të jepen brenda 16 shkurtit (nuk parashikohen shtyrje), do të paraprihen përmes një akordi me grupin. Për të zhvendosur datën e pagesave është i nevojshëm edhe miratimi i të federuarve që janë nën kontratë por nuk punojnë më në “Appiano”, si Luçiano Spaleti dhe stafi i tij.
Azhurnime të reja nga “Sole 24 Ore” edhe lidhur me bisedimet mes Interit dhe “Bc Partners”: skenari më i mundshëm, në rast se bisedimet do të vazhdonin, mund të jetë shtimi i kapitalit dhe blerja e 51% të kuotave, me “Suning” që do të mbetej në minorancë.
