Egnatia bën një goditje treshe në merkato. Pas mbrojtësit Franc Ymeralilaj, si dhe sulmuesit Beji Antoni që erdhën nga Bylisi, klubi i sapongjitur në Kategorinë Superiore ka siguruar shërbimet e tre lojtarëve të tjerë të afirmuar.
“Panorama Sport” zbulon ekskluzivisht se mesfushori i krahut, Arbër Çyrbja, i cili ka luajtur me Teutën, Elbasanin, Kukësin dhe së fundmi Gjilanin, ka arritur marrëveshjen me rrogozhinasit.
E njëjta gjë mund të thuhet edhe për qendërmbrojtësin nga Shkupi, Besart Krivanjeva. Ky i fundit ka qenë në sezonin e fundit titullar i padiskutueshëm me Shkupin në Superligën maqedonase dhe tashmë do të luajë për herë të parë në Shqipëri me fanellën e Egnatias.
Drejtuesit rrogozhinas nuk janë ndalur me kaq, por kanë bindur edhe talentin e Besës, Alesandro Kacbufi. 20-vjeçari u largua nga kavajasit pas dy sezoneve radhazi në Kategorinë e Parë, ndërsa bëhet fjalë për një qendërmbrojtës me shumë per spektivë dhe për më tepër njihet mirë nga trajneri Gugash Magani.
Afrimet e Çyrbjes, një lojtari të afirmuar prej vitesh në Superiore, por edhe mbrojtësve Krivanjeva e Kacbufi, tregojnë për seriozitetin që ka klubi në prag të ballafaqimit në elitë. Drejtuesit duan të ndërtojnë një skuadër që të mos jetë kalimtare në Superiore, por me objektiva madhorë.