Milwaukee Bucks është shpallur kampion në Konferencën e Lindjes, pas fitores 118-107 ndaj Atlanta Hawks. Ekipi i Bucks fitoi 4-2 serinë e ndeshjeve finale dhe tashmë do të sfidojë për titullin kampion të NBA-së rivalët e Phoenix Suns, kampion në Perëndim.
Një triumf i merituar i ekipit të Milwaukee, që edhe pse me mungesa arriti të mposhtë Atlanta, që luante në fushën e saj. Ai që shkëlqeu në fushë ishte Khris Middleton, autor i 32 pikëve, mbështetur nga Holiday me 27 pikë.
Një dyshe që bëri të mos ndihej mungesa e Giannis Antetokounmpo, ende i dëmtuar. Për vendasit u dalluan Reddish me 21 pikë e Bogdanovic me 20 pikë, por që s’mjaftuan. Nga data 6 korrik, do të nisin finalet, me Phoenix që ka faktorin fushë në favorin e tij.
