Samuel Umtiti dukej i destinuar për t’u larguar këtë verë nga Barcelona. Mbrojtësi kishte qenë jashtë planeve të trajnerit Kuman dhe tifozët e vunë në shënjestër, pasi nuk aktivizohej e për më tepër as nuk kishte pranuar të ulte rrogën në një moment krize.
Por një mbledhje shumë e çuditshme në klub vulosi fatin e tij dhe qëndrimin e mëtejshëm të mbrojtësit që u shpall Kampion Bote me Francën, në radhët e katalanasve edhe për një tjetër sezon në pritje të momentit për të treguar se sa vlen. Sipas “Mundo Deportivo”, në gusht Laporta prit lojtarin në zyrën e tij, pasi mbrojtësi kishte kërkuar që të sqarohej kjo situatë një herë e përgjithmonë.
Presidenti kishte filluar ashpërsisht të kritikonte lojtarin, në praninë e 2 drejtuesve të tjerë të klubit. Futbollisti ndërkohë fajësoi shërbimin mjekësor në klub për diagnostikimin e gabuar të dëmtimit dhe fazën e rikuperimit, ndërsa tregoi se mjekë shumë të njohur jashtë klubit kishin vërtetuar se tashmë ishte pranë kthimit të plotë. Kur Laporta filloi të ulte tonin dhe pranoi se edhe klubi nuk i kishte qëndruar afër në momentin e vështirë, raportohet se Umtiti shpërtheu në dënesa para presidentit, duke kujtuar vuajtjet që kishte kaluar me dëmtimet e njëpasnjëshme në vitet e fundit.
Takimi u mbyll me një përqafim mes palëve dhe ai ishte momenti kur u vendos që Umtiti të vazhdonte te Barcelona
