I kënaqur pas fitores kundër Lacios, kapiteni i Milanit, Alessio Romagnoli komentoi për mikrofonat e televizionit “DAZN” paraqitjen e kuqezinjve dhe pritshmëritë për këtë sezon.
“Bëmë një ndeshje perfekte kundër një skuadre të fortë. Bëmë atë që duhet të bënim”, tha mbrojtësi, që ndalet edhe te momenti i tij personal:
“Unë përpiqem gjithnjë që të jap maksimumin si në stërvitje ashtu edhe në ndeshje. Vitin e shkuar bëra disa gabime. Por e rëndësishme është të dish të ngrihesh dhe të përpiqesh të korrigjohesh dhe përmirësohesh gjithnjë. Unë duhet të vazhdoj të luaj në maksimumin tim kur të thërritem në detyrë dhe të vendos në vështirësi trajnerin për të më zgjedhur”.
“Djalli” nuk ka gabuar ende këtë nisje sezoni dhe duket se do të jetë një rivale e fortë për titull. Kuqezinjtë rikthehen edhe në skenën që i ka munguar për kaq shumë vite, Ligën e Kampionëve.
Por mendimet e Romanjolit nuk shkojnë kurrsesi kaq larg, por vetëm në ndeshjen e radhës: “Është ende shumë herët për të folur për titullin. Jemi vetëm në javën e tretë të një kampionati që është ende shumë i gjatë. Le të shijojmë fitoren e fundit me Lacion dhe të mendojmë për ndeshjen e së mërkurës kundër Liverpulit”.
