Kampionët e Atletiko Madrid kanë regjistruar sot humbjen e parë sezonale në La Liga dhe nuk ka qenë ndaj një prej skuadrave pretendente për titull apo për zonën Champions. Ekipi i Simeones është mundur me shifrat 1-0 nga Deportivo Alavesh, e cila nuk kishte marrë asnjë pikë deri në ndeshjen e sotme.
Goli i Laguardia që në minutën e katërt bëri që Atletiko të kalonte një sfidë në sulm në kërkim të barazimit, përballë vendasve të cilët u mblodhën në prapavijë dhe mbrojtën me çdo mënyrë rezultatin, të ndërgjegjshëm që hera e fundit që kishin mundur këtë kundërshtar ishte në majin e vitit 2003.
Dominimi i Atletikos ishte i dukshëm por Jorente, Hermoso, De Paul dhe Korrea shpërdoruan të gjithë mundësitë që iu shfaqën. Kështu, Atletiko shkon me një humbje në ndeshjen e rëndësishme të Ligës së Kampioneve ndaj Milanit, ndërsa Alavesh duket se ka ringjallur shanset e saj për mbijetesën më shumë për shkak të një fitoreje e cila padyshim do të shërbejë për moralin e kthejë entuziazmin në ekip.
