Erling Haland është emri që qarkullon në çdo klub të madh europian. Të gjithë janë gati të bëjnë çmenduri për lojtarin i cili para datës 30 prill, duhet të ketë të zgjidhur çështjen e largimit nga Borusia Dormtund, duke aktivizuar klauzolën që ia lejon këtë me pagesën e vetëm 75 milionë eurove.
Përballë tij janë vënë disa projekte shumë të rëndësishme ekonomike dhe sportive, ndërsa tani lojtarit i mbetet të zgjedhë se cilit do t’i bashkohet. Një prej tyre është edhe ai i Barcelonës, ku protagonist direkt është bërë edhe vetë trajneri Çavi Hernandez.
Gazetari i njohur spanjoll Oriol Domenek, ka zbuluar se tekniku nuk është ndalur te “telefonata e zakonshme”. Ai ka bërë të ditur se ka pasur një takim të mirëfilltë të tij me sulmuesin norvegjez katër ditë më parë, ndërsa i pranishëm ishte edhe drejtuesi i katalanasve, Zhordi Krujf. Një takim për të shpjeguar idenë e Çavit për Barcelonën e të ardhmes dhe ku Haland do të kishte një rol qendror. Me shpresën që të bindë makinerinë e golave që t’i bashkohet skuadrës e cila synon që të nisë një cikël të ri fitues.
