Pak ditë më parë trajneri i Hamburg, Christian Titz, e dërgoi Mërgim Mavrajn të stërvitet me ekipin e të rinjve, si masë e formës jo të mirë të futbollistit kuqezi. Ky vendim, sipas gjermanes ‘Bild’, i ka shkaktuar mjaft probleme skuadrës së Hamburg, pasi ka shkelur kontratën që ka me mbrojtësin kuqezi, si edhe statusin e lojtarëve profesionistë, që duhet të stërviten vetëm nga një trajner me licencë.
Momentalisht skuadra U-21 e Hamburgu-t stërvitet nga Steffen Weiß, i cili nuk disponon licencën e përshtatshme për këtë rast. Këtë detaj e kanë evidentuar përfaqësuesit e Mavrajt të cilët kanë vendosur në dijeni drejtuesit e Hamburgut për shkeljen, duke lënë të hapur mundësinë që të merrnin hapat e nevojshëm ligjorë.
Fakti që futbollisti 31-vjerçar ka të drejtë në qëndrimin e tij, u shoqërua me alarm te Hamburgu, me klubin që vetëm prej rastit të Mavrajt punësoi me kohë të pjesshme ish-sulmuesin profesionist, Vahid Hashemian që mori për disa ditë drejtimin e ekipit të të rinjve.
Gjithmonë sipas ‘Bild’ kjo situatë nuk mund të vijojë për shumë gjatë, pasi Vahid Hashemian punon edhe në skuadrën e 17-vjeçarëve dhe për këtë arsye Hamburgu-t i duhet të gjejë një zgjidhje tjetër.
Gazeta shkruan se duke nisur nga java e ardhshme do të emërojë një tjetër trajner te ekipi i 21-vjeçarëve, vetëm që ai të jetë i përshtatshëm për të stërvitur mbrojtësin shqiptar. Bëhet fjalë për Achim Feifel, ish-trajnerin e ekipit të femrave të Hamburgut.
Edhe pse klubi po punon të marrë masat, në situatën e krijuar dhe me shkeljen e evidentuar të kontratës, mbetet aktuale mundësia që në fund të sezonit Mërgim Mavraj të kërkojë prishjen e kontratës me Hamburgun, një vit përpara përpara përfundimit të marrëveshjes.
