Harry Kane pretendon se është ai autori i golit të fitores kundër Stoke City, që do t’i jepte mundësinë të thyente rekordin personal, edhe pse ky gol i është dhënë zyrtarisht danezit Christian Eriksen.
“Premier League Match Centre”, që merret me këto çështje, pasi pa me kujdes episodin e ndodhur në minutën e 63-të, vendosi se topi i goditur nga Eriksen gjatë një faulli nuk u devijua nga askush dhe u ndal pas shpinës së portieri Jack Butland, duke vulosur fitoren 2-1 të “spursave”.
Gjithsesi, Kane është shprehur se ai e ka devijuar topin me shpatull dhe pretendon se ka shënuar 36 gola në këtë sezon.
“Eshtë goli im. E devijova me shpatull, pastaj topi shkoi në rrjetë. E pretendoj këtë gol, sepse e kam shënuar unë,” – tha Kane për “Sky Sports”.
Ndërkohë, Eriksen, që shënoi edhe golin e parë për londinezët pohoi: “Ai festoi si ta kishte shënuar ai golin dhe unë i besoj kur thotë se e ka prekur topin.”
