Është hedhur para pak minutash në Nion të Zvicrës shorti i gjysmëfinaleve të Ligës së Europës, i cili ka rezervuar 2 përballje spektakolare.
Arsenali dhe Atletiko do të përlasen së bashku në gjysmëfinale, ndërsa Marseja do të ketë kundërshtar, Salzburgun e Valon Berishës.
Kompeticionet UEFA kanë dhënë verdiktet e tyre pas çerekfinaleve të mbyllura dje me Ligën e Europës. Pasi Liga e Kampioneve ka njohur mes së martës dhe së mërkurës në mbrëmje katër finalistet e mbetura të kompeticionit më të rëndësishëm për klube, edhe “kupa e vogël” ka mësuar ekipet që do të tentojnë trofeun e dytë kontinental.
Për sa i përket shortit, sot në orën 13:00, në Nion të Zvicrës, do të zbardhen çiftet gjysmëfinaliste të të dy turneve. Sipas rregullores së UEFA-s, ndryshe nga 1/8-at, ku nuk lejohen përballje nga i njëjti shtet apo akoma më shumë edhe çiftimi i dy skuadrave që kanë luajtur më parë në grupe, në fazën çerekfinale, por edhe në atë gjysmëfinale, nuk do të ketë barriera, pra, shorti është i lirë. Kjo do të thotë se mund të ketë çfarëdolloj përballje të mundshme.
Në Ligën e Kampioneve, Reali i Madridit, Liverpuli, Roma dhe Bajerni i Mynihut do të presin fatin e goglave, ashtu sikurse në Ligën e Europës do të bëjnë Arsenali, Marseja, Salzburgu dhe Atletiko e Madridit.
Nëse në Champions skuadra për t’u mundur në letër është Reali, në Ligën e Europës favoritet janë Arsenali dhe Atletiko. Madje, për “topçinjtë” kjo është edhe rruga më e shkurtër, duke parë pozitat e tyre në kampionat që, duke fituar Ligën e Europës, të kualifikohen për në Champions edhe pa hyrë mes katër të parave në Premier Ligë.