“UEFA është thellësisht e tronditur nga sulmi që ka ndodhur në nisje të ndeshjes mes Liverpool dhe Roma-s dhe ngushëllimet tona shkojn për viktimat dhe familjet e tyre”. Kështu, me një notë zyrtare, UEFA komenton incidentet që ndodhën para se të niste takimi Liverpool – Roma në “Anfield Road”, incident që solli plagosjen e tifozit 53 vjeçar irlandez të të kuqve, i cili hyri në koma pasi disa tifozë të Roma-s i shkaktuan dëmtime të rëndë të trurit. Pas këtij incidenti janë arrestuar 5 tifozë të Roma-s.
“Autorët e këtij sulmi të neveritshëm nuk kanë vend në futboll dhe besojmë se ata do të trajtohen me të njëjtën ashpërsi nga autoritetet policore”, vijon deklarata e UEFA-s, e cila përfundon duke thënë se “qëndrojnë në pritje të raportit të plotë para se të vendosin për akuzat disiplinore”.
Ndërkohë që mendohet për ndeshjen e kthimit të gjysmëfinales së Champions League, e programuar që të zhvillohet më 2 maj, vëmendja do të jetë maksimale për përleshjet e ndodhura në Anfield Road. Plani i sigurisë, sipas asaj që mësohet, dp të zhvillohet në ditët e ardhshme gjatë një bisede teknike me drejtuesit e policisë. Mbikëqyrja në zonën e stadiumit do të nisin disa orë përpara ndeshjes. Nën mbikëqyrje nuk do të jetë vetëm zona përreth stadiumit “Olimpico”, por edhe qendra e kryeqytetit ku tifozët mund të përleshen para ose pas ndeshjes.
