Në pistat e Formula 1 nuk fiton që prej vitit 2013, kur pilotonte një makinë Ferrari, por Fernando Alonso nuk e ka humbur asnjëherë talentin e tij. Piloti spanjoll, 2 herë kampion bote në Formula 1, ka triumfuar sot në garën e Botërorit të Endurance 2018, në garën 6 orëshe të zhvilluar në pistën e Spa, në Belgjikë. Alonso garoi me makinën Toyota së bashku me shokët e skuadrës Sebastien Buemi e Kazuki Nakajima, duke triumfuar në një nga pistat legjendare të automobilizmit.
Makina Toyota e dominoi këtë garë, pasi edhe në vendin e dytë u rendit makina japoneze e pilotëve Kobayashi-Lopez-Conwey, ndërsa në vendin e tretë makina Rebellion e Lotterer-Senna-Jani. Kjo ishte gara e parë sezonale e Botërorit të Endurance dhe Alonso arriti të tregojë aftësitë e tij në pistën belge. Kjo garë ishte një test i mirë për spanjollin, që më datat 16-17 qershor do të marrë pjesë në garën 24-orëshe të La Manshit, ku synon fitoren dhe të bëhet legjendë e garave të automobilizmit.
YES! He’s done it. 🎉 @alo_oficial brings the #8 car home to win at #6hSpa. 🏁🏆 Congratulations to Fernando and his @Toyota_Hybrid teammates. 👊 #WEC pic.twitter.com/LDCxEcsvo8
— McLaren (@McLarenF1) May 5, 2018
