Të kalosh nga Stuttgart te RB Leipzig është pak a shumë si të largohesh nga Napoli për të luajtur te Juventus! Milan i pëlqen lojtarët e tillë dhe si rezultat emri i ri që po lakohet për një kalim në sulmin e kuqezinjve është ai i Timo Werner, teksa po shtohet “thashethemi” Gonzalo Higuain.
“Do të marrim një qendërsulmues të rëndësishëm pavarësisht asaj që do të ndodhë me UEFA-n,” – ka përsëritur drejtori sportiv i Milan, Massimilano Mirabelli duke mbajtur gjallë shpresat e tifozëve për një numër 9 të mirëfilltë.
Milan ka kërkuar informacione edhe për Zaza dhe Ciro Immobile. Për të parin është përfolur për një shkëmbim me Bacca, për të dytin mendohet se misioni është i pamundur prej rezistencës së Lotito, kësisoj emri i gjermanit Werner është më i mundshmi për Milan, sepse duket se lojtari që do të luajë në “Rusi 2018” i ka thënë “po” idesë për t’u transferuar në Serie A.
