Sebastian Vettel është optimist në prag të garës së Çmimit të Madh të Kanadasë që zhvillohet këtë fundjavë në pistën e Montreal. Njëvendëshja e pilotit gjerman do të ketë disa ndryshime në motor këtë garë, ashtu siç dhe e lejon rregullorja, por kjo gjë nuk do të ndodhë te rivalët e Mercedes. “Kemi një makinë të mirë, sidomos në pjesët e drejta dhe në përgjithësi kjo është një pistë që na përshtatet, ndaj duhet të bëjmë një paraqitje të mirë”, tha Vettel.
“Për sa i përket ndryshimeve në motor, kjo ishte në planet tona që në fillim të sezonit, kur u vendosën rregullat e reja. Kjo është një pistë që e lodh motorin, ndaj ishte e rëndësishme të bënim disa modifikime. Të shohim se si do të funksionojnë në garë”, tha më tej piloti i “kokëkuqes”, që nuk bën parashikime. “Të shohim se çfarë ndryshimesh do të kenë edhe rivalët tanë e më pas të shohim se si do të shkojnë provat e lira për të bërë një parashikim”, u shpreh Vettel.
