Pas triumfit pak ditë më parë në turneun e Hopman Cup, tenisti zviceran Roger Federer përgatitet për grand slemin e parë sezonal, atë të Australian Open, që nis më 15 janar në Melburn. Një paraqitje dhe rezultat i mirë i numrit 2 në botë, që luan për të mbrojtur titullin e fituar një vit më parë. “Ishte një javë e bukur që u mbyll mirë. Tani kam kohë për të pushuar disa ditë dhe stërvitur me kujdes, pa u sforcuar. Jam gati dhe nuk kam asnjë presion mbi vete, pavarësisht se ndaj kujt luaj”, tha Federer.
“Gjatë kësaj jave do të përgatitem për të qenë në formën e përkryer, duke punuar më pak, por duke shtuar cilësinë. Kështu do të kem më shumë kohë të lirë, duke kaluar edhe më shumë kohë me familjen. Kam mësuar shumë nga përvojat e mëparshme. Tani luaj më shumë për dashurinë dhe pasionin që kam ndaj tenisit se sa për parà”, u shpreh Roger Federer, tashmë 36 vjeç dhe në kërkim të një tjetër sezoni të shkëlqyer pas atij që sapo u mbyll, ky fitoi 7 turne.