Skuadra e Tiranës në basketboll për meshkuj do të rikthehet nesër në mbrëmje në Ligën Ballkanike (BIBL), ku do të luajë takimin e radhës të vlefshëm për edicionin 2017-2018 të këtij turneu rajonal.
Kampionët bardheblu do të bëjnë një udhëtim të shkurtër, pasi do të kenë përballë skuadrën kosovare të Bashkimit të Prizrenit, një derbi mes dy skuadrave shqiptare.
Për Tiranën një shans i mirë për t’u rikthyer të fitorja në këtë event pas 3 humbjeve radhazi, turne ku deri më tani ka arritur vetëm 2 fitore dhe 5 humbje, duke u klasifikuar në vendin e pestë mes 7 skuadrave pjesëmarrëse (kosovarët renditen një vend më sipër).
Ndeshja do të nisë në orën 19:30 dhe do të gjykohet nga Ivan Mijalkovski, Aleksandar Davidov dhe Martin Petrovic.
