Tenistja rumune Simona Halep ka humbur mundësinë që të rikthehej “Numri 1” në botë, pasi u tërhoq sot nga turneu i Dohës (Katar) ku mori pjesë këtë javë. Edhe pse rumunia pat fituar në çerekfinale me lehtësi 2-0 ndaj amerikanes Catherine Bellis (6-2, 6-4), Halep u tërhoq, pasi pati një dëmtim në këmbë, ashtu sikurse në grand slemin e Australian Open. Duket se ky dëmtim nuk është mbyllur ende për Halep, që vendosi të tërhiqej, për të evituar që gjërat të përkeqësoheshin.
Në gjysmëfinale, Halep duhej të luante me spanjollen Garbine Muguruza, që pas tërheqjes së rumunes ka siguruar direkt një biletë për në finalen e turneut të Dohës. Në gjysmëfinalen tjetër do të luajnë danezja Caroline Wozniacki dhe çekja Petra Kvitova, ku fituesja do të përballet në finale me Muguruzën. Por, pas tërheqjes së Halep nga turneu, tenistja daneze e ka të sigurt mbrojtjen e kreut të renditjes botërore.
