PSG i madh shkoi në Bernabeu. U duk se gjithçka ishte në favor të francezëve për t’i vënë vulën një sezoni të suksesshëm të parisienëve, e njëherësh për të rrëzuar përfundimisht “Los Blancos”. Por, në përfundim ndodhi e kundërta, fitorja i qeshi Real Madrid, që veçse u rikthye të gëzojë pas triumfit 3-1 ndaj PSG, me një këmbë në çerekfinalen e Champions League, ka ndezur krizën në dhomën e zhveshjes së parisienëve, që tashmë është në tymanjë. Trajneri Emery është vënë në qendër të kritikave, si nga futbollistët ashtu edhe nga media franceze. Cavani është i mërzitur për zëvendësimin e shpejtë, Di Maria dhe Thiago Silva të indinjuar për mosaktivizimin, me bashkëshortet e të dyve që kanë shpërthyer tërbimin e tyre në rrjetet sociale, ndërkohë që Rabiot i kundërvihet shokëve të skuadrës. Për të përkeqësuar situatën menduan trajneri dhe presidenti i ekipit që akuzuan për gjykim arbitrar në favor të Real Madrid, për të nxitur papëlqyeshmërinë e UEFA-s dhe mediave.
Në fund të këtij dueli të parë të dështuar nga francezët, trajneri Emery del i lagur në Bernabéu. Humbja e ka vënë atë nën dritën e proxhektorëve dhe akuzave gjithashtu. Ai ka pësuar në total 9 gola në dy vizitat e tij në Spanjë, respektivisht vitin e kaluar në Camp Nou dhe mbrëmjen e të mërkurës në Bernabéu, që i pozicionon parisienët shumë pranë një tjetër eliminimi. Disfata ndaj Real Madrid la shumë plagë të hapura në dhomën e zhveshjes së PSG. Zëvendësimi i Di Maria, një prej futbollistëve më në formë të momentit, që nuk luajti për asnjë minutë në Bernabeu, është një prej tyre. Bashkëshortja e ish-madrilenit është përgjegjësie për publikimin e këtij zhgënjimi. “Përpjekjet e tua+puna jote e tepruar+golat e tu+asistet e tu+momenti yt më i mirë . Por ato që nuk marrin vesh asgjë nga futbolli janë femra…”, shkroi Jorgelina Cardoso. Një viktimë e helmuar nga strategjia e trajnerit Emery, me të cilën u bashkua edhe bashkëshortja e mbrojtësit brazilian Thiago Silva, gjithashtu jashtë formacionit. Lista e të mërziturve u kompletua me Cavanin, që u zëvendësua nga tekniku Emery në minutën e 65’.
Në sulm ndaj trajnerit spanjoll të PSG janë hedhur edhe mediat franceze, sikurse L’Équipe, që ka akuzuar Emery për ndryshimet komplekse, të cilat çuan në dobësimin e skuadrës, aq sa për të humbur të gjithë forcën. Media gjigante franceze thekson edhe dilemën mbi mungesën e marrëdhënies teknike ndërmjet tridhëmbëshit me vlerë 500 million euro, dhe parashikon një ditë të zezë për teknikun spanjoll. Akuza që mbështeten edhe nga gjigantët e tjerë mediatikë francezë, si: ‘Le Parisien’ dhe ‘Le Figaro’.
