Leo Messi do që Justin Kluivert të injorojë interesin e treguar për të nga Manchester United dhe të bashkohet me të te Barcelona.
Ylli i Ajax ka përfunduar në shënjestrën e klubeve më të mëdha të Europës dhe pritet të jetë një nga më të kërkuarit në merkaton e verës. Djali i Patrick Kluivert po shkëlqen në kampionatin holandez.
Ndërsa 18-vjeçari është këshilluar që të qëndrojë tek Ajax dhe të vazhdojë rritjen e tij, United dhe Barcelona duket se janë gati t’i shpallin luftë njëra-tjetrës për të siguruar shërbimet e tij.
Jose Mourinho ka thënë se do të donte ta kishte në dispozicion Kluivert në të ardhmen. Ndërkohë, sipas spanjolles “Don Balon”, komentet e portugezit janë konsideruar si një ofertë e vërtetë që Kluivert të transferohet në “Old Trafford”.
Por sulmuesi i ri ka pranuar këtë javë se ëndrra e tij është Barcelona. Messi e do në “Camp Nou” që tani dhe duket se e ka kontaktuar holandezin në fillimin e 2018-ës.
Tani pritet që Kluivert t’i kërkojë klubit që ta lërë të lirë të largohet dhe të luajë në krah të super yllit argjentinas.
Por kjo dëshirë e Messi-t mund të krijojë pakënaqësi brenda Barcelona-s. Sipas “Don Balon”, Ousmane Dembele është i shqetësuar se një kalim i mundshëm i holandezit te katalanasit do të ishte një pengesë për të. Francezi nuk po shkëlqen te Barça dhe nëse holandezi do të merret, ai mund të kërkojë të largohet verën e ardhshme.
