“Ujku” e la gjurmën në dëborën e “Zeqir Ymerit”. Dy gola të Ali Soues e kthyen takimin në një rezultat që nxjerr përfundimisht Kukësin nga lufta për titull dhe kurorën e nis për në Korçë.
E tillë ishte situata e krijuar në ndeshjen e djeshme mes Kukësit dhe Skënderbeut, ku, pavarësisht 5 mungesave të ekipit të parë, Soue mori mbi supe gjithë kundërshtarët dhe vendosi i vetëm takimin.
Në një intervistë për “Panorama Sport” sulmuesi i Skënderbeut tregon atë që e përmbysi atë paraqitje jo të mirë të pjesës së parë dhe “luftën” e hapur me mbrojtjet kundërshtare.
“Mund të them se trajneri na shkundi në pushim. Na kërkoi që të hynim në fushë me mentalitetin e fituesit, të një ekipi të madh që ka bërë krenar të gjithë Shqipërinë në Europë. Këto fjalë na prekën në sedër dhe arritëm të ndryshonim në 45 minutat e dyta”, tha ndër të tjera Soue në intervistën e tij.
