Ngatërroi emrin e Astorit: shkarkohet nga puna. I ka kushtuar shtrenjtë gabimi spikerit të stadiumit “Kuri” të Peruxhas, Françesko Birkoloti.
Presidenti i klubit, Masimiliano Santopadre, vendosi ta largonte nga puna sepse dy herë e ka thënë gabim emrin e mbrojtësit të Fiorentinës, i cili u nda nga jeta disa javë më parë. Gjatë momentit kur të dyja skuadrat po mbanin një minutë heshtje, spikeri tha “Astolfi” dhe jo Astori. Gabimi i përsëritur nuk mund të mbetej pa ndëshkim.
Sipas “Umria24” presidenti e njoftoi me mesazh spikerin e stadiumit për një takim në zyrat e klubit dhe aty i komunikoi shkarkimin nga puna. Ai kërkoi ndjesë për gabimin që bëri dhe tha se as vetë nuk e kuptoi pse gaboi në momentin që duhet të thoshte emrin e Astorit. Vendin e tij e ka marrë Marko Takuçi.
