Pas përfundimit të sezonit të rregullt është koha që 16 ekipet më të mira në NBA, 8 në Konferencën e Lindjes dhe 8 në Konferencën e Perëndimit të zbresin në fushë në çerekfinalet e play off-it. Ekipe që vijojnë ende garën për titullin kampion. Në të dyja Konferencat pritet një rivalitet i madh dhe shumë emocione për të përcaktuar ekipet gjysmëfinaliste. Faza çerekfinale nis sot dhe do të zgjasë maksimumi deri më 29 prill, nëse luhen të 7 ndeshjet (avancon më tej skuadra që fiton 4 ndeshje).
Skuadra kampione e Golden State do të përballet me San Antonio, por Warriors do të luajnë në këtë fazë të sezonit pa yllin e tyre Stephen Curry, që mund t’i ndërlikojë pozitat. Ndërkohë që, një rritje të ndjeshme këtë sezon ka patur Houston, që e mbylli në vendin e parë sezonin e rregullt dhe kërkon titullin. Oklahoma mund të jetë surpriza e kësaj Konference, që pret në fushën e saj Utah Jazz.
Në Lindje, surprizën këtë sezon në play off mund ta bëjë ekipi i Philadelphia, që nuk humbet prej 16 ndeshjesh dhe ka bërë një paraqitje fantastike në dy muajt e fundit. Toronto mbetet ekipi favorit, që e mbylli sezonin e rregullt në vendin e parë, por edhe Cavaliers nuk mbeten pas. Përvoja që Cleveland kanë në play off mund t’i ndihmojë në sfidat çerekfinale ndaj Indianës. Skuadër e vështirë për t’u eliminuar është Boston, i renditur i dyti në Lindje dhe që pretendon për titull me të rinjtë që ka në përbërje.
Konferenca e Lindjes
1-8, Toronto – Washington
2-7, Boston – Milwaukee
3-6, Philadelphia – Miami
4-5, Cleveland – Indiana
Konferenca e Perëndimit
1-8, Houston – Minnesota
2-7, Golden State – San Antonio
3-6, Portland – New Orleans
4-5, Oklahoma – Utah Jazz