Skënderbeu mori dje një lajm të mirë nga CAS, ndërsa është në pritje të një tjetër vendimi, i cili është akoma më i rëndësishëm për të ardhmen e bardhekuqve në Europë, por edhe në kampionatin shqiptar. Është kapiteni Orges Shehi, i cili flet për titullin e rikthyer, por edhe për rekordin që do të regjistrojë një muaj më pas, sepse do të bëhet lojtari i parë në Shqipëri që do të mbajë mbi supe 7 tituj kampionë me të njëjtën skuadër.
Më parë kanë qenë Shkëmbi, Arapi dhe Llapanji që kanë pasur të njëjtin rekord me të, ndërsa pas pak kohësh do të ejtë i vetëm. Megjithatë, Shehi shpreh besimin edhe te çështja më e madhe, heqjen e penalizmit nga UEFA pas gjyqit që do të zhvillohet në CAS.
“Jo, kurrsesi nuk e kemi ndjerë se mund të humbisnim trofeun, sepse ne kemi qenë fituesi. Është trofe që e kemi marrë në ditën e fundit. Jemi zgjuar dje me një lajm shumë të mirë, për atë trofe që e fituam me shumë mund dhe shumë djersë”.
Rekordi – “Është kënaqësi e veçantë. Është e qartë që Skënderbeu sa hyrë hyn në kampionat, hyn për ta fituar atë. Është ndjesi e veçantë që të jesh pjesë e kësaj skuadre. Ky do të jetë trofe i veçantë për mua. Sepse ky është një vit shumë i mirë për mua, sepse bëmë paraqitje të shkëlqyer në Europë dhe në kampionat”.
Beteja me CAS-in – “Sigurisht që është një shpresë e madhe. Sepse pjesë e atyre akuzave ishin dhe ndeshjet e kampionatit. Kështu që ne kemi besimin që ta fitojmë, sepse për këtë pjesë nuk ka pasur asnjë lloj fakti dhe asnjë lloj prove kundër nesh”.