Sesioni i dytë i provave të lira që u zhvilluan sot në mbrëmje në pistën e Sakhir ka përmbysur rezultatet e paradites. Kimi Raikkonen dhe Sebastian Vettel, të dy pilotë të Ferrarit, kanë dhënë kohët më të shpejta, duke zënë dy vendet e para në mbyllje të ditës së parë. Fakt që tregon se “kokëkuqja” ndihet mjaft mirë në pistën e Sakhir, ku ditën e diel do të zhvillohet gara e Çmimit të Madh të Bahrein në Formula 1, gara e dytë sezonale.
Sesioni i dytë u zhvillua me drita artificial, kushte në të cilat do të zhvillohet edhe gara ditën e diel, ndaj ky rezultat i mirë i Ferrarit jep shumë shpresa edhe për garën e së dielës. Raikkonen dha kohëmn 1’29”817, duke lënë pas me 9 të mijëtat Vettel, ndërsa pas tyre u renditën dy pilotët e Mercedes, me Bottas që ishte më i shpejtë se Hamilton. Por ajo që ra në sy ishte se Ferrari ishte gjysmë sekondi më i shpejtë se makina gjermane.
Në vijën e tretë të nisjes janë për momentin Max Verstappen e Daniel Ricciardo me Red Bull, me këtë të fundit që ishte më i shpejtë gjatë paradites, por jo në një pistë me temperatura më të ulta siç u zhvilluan provat e dyta. Vetëm i nënti Fernando Alonso me McLaren, ndërkohë që nesër në mbrëmje , ora 17:00 dhe të dielën po në këtë orë, do të zhvillohet respektivisht pro9vat zyrtare dhe gara e Çmimit të Madh të Bahrein në Formula 1.
