Përlotja e Ylli Agës për komentin e ndeshjes Lacio-Inter 2-3, ka bërë jehonë edhe në Itali. Portali i Lacios, “lazionews.eu”, i është referuar shkrimit të “Panorama Sport” ku komentatori i Supersport” ka rrëfyer eksperiencën e rrallë.
Natyrisht, portali lacial i gëzohet faktit që gazetarin shqiptar e ka bërë për të qarë një djalë i vogël lacial dhe jo një interist. Ndërkaq, ata kanë zbardhur pothuajse të plotë intervistën e Ylli Agës dhënë për “Panorama Sport”. Ja çfarë tha ai një ditë më parë për gazetën:
Ylli, çfarë ndodhi pas Lacio-Inter 2-3?
Shikoni, unë isha i ndërgjegjshëm për rëndësinë e ndeshjes, por nuk e dija që do ta komentoja unë atë ndeshje. Zakonisht këto ndeshje i komenton Shakohoxha ose Alban Xhihani…
Dakord, por çfarë ndodhi që u emocionuat aq shumë?
U preka shumë sepse ishte një nga ndeshjet me emocionuese që kam komentuar dhe kam parë në Serinë A.
Po lotët në fund?
Në koment përgatitesh kryesisht për gjërat e përgjithshme, por një imazh i vetëm mund të mjaftojë për të të emocionuar pa fund. Mua më prekën lotët e një tifozi të vogël të Lacios… Më prekën thellësisht shumë.
A ju ndodh shpesh që të përloteni në një koment?
Rrallë, shumë rrallë më ka ndodhur.
A jeni ju tifoz i Lacios ose i Interit?
Nuk jam tifoz i asnjërës prej këtyre skuadrave, edhe pse ky profesion të bën nga pak tifoz me të gjitha skuadrat.
Para ndeshjes a kishe ndonjë preferencë?
Po, para ndeshjes kisha një dëshirë që takimi të mbyllej nëe mënyrën më të mirë për Taren dhe Strakoshën.
