Armando Cungu ka filluar sot zyrtarisht punën si trajner i Kukësit. Pas prezantimit me lojtarët është mbajtur dhe seanca e parë stërvitore me verilindorët, ndërkohë që në përfundim ka pasur dhe një prononcim të shkurtër të tij.
“Së pari dua të falenderoj presidentin Gjici për mundësinë e dytë që më ka dhënë. Për mua Kukësi është një dashuri e vjetër”, kanë qenë fjalët e para të Cungut për rikthimin e tij në krye të stolit të verilindorëve.
Në lidhje me ndeshjen e kthimit kundër Valetës, trajneri shkodran u shpreh besimplotë se kualifikimi është i arritshëm. “Patjetër që pretendojmë kualifikimin dhe po punojmë fort për ta arritur. Ekipin e njoh shumë mirë pasi disa lojtarë i kam stërvitur, por një ndihmesë të madhe do më japi edhe Hallaçi dhe Nexhipi”, ka deklaruar numri një i stolit të nënkampionëve.
Në fund ai pati dhe një mesazh për ish-trajnerin Pakult për të cilin tha se meriton respekt maksimal për punën e tij me skuadrën.
