Willian ishte lojtari i kombëtares brazilian, përgjegjës për paraqitjen para shtypit ditën e sotme, por ai nuk donte të fliste për të ardhmen e tij, apo lajmin që e sheh atë në fokus të Barcelonës.
Barcelona: “Unë kam parë disa spekulime në internet rreth Barcelonës, por kjo nuk është koha për të folur për këtë. Jam i përqendruar në Kupën e Botës dhe kjo është e gjitha për të cilën kujdesemi tani për tani”.
Rënia e Casemiro: “Të shohim nëse luan ai, apo Fernandinho, i cili është një opsion. Ata janë dy lojtarë, të cilët e bëjnë Brazilin edhe më të fortë. Luajnë mirë dhe gjithmonë e ndihmojnë ekipin në vështirësi. Ne kemi cilësi për ta zëvendësuar Casemiro”.
Dueli me Hazard: “Kjo do të jetë hera e parë, që luaj kundër tij, pas pesë vitesh bashkë si shokë grupi te Chelsea. Ai është një person shumë i përulur, por është koha që të gjithë të mbrojnë fanellën e kombit të tij dhe kjo është ajo që ne do të bëjmë”.
Botërori juaj: “Në çdo ndeshje, unë jap gjithçka. Ndjehem mirë dhe jam shumë i kënaqur me punën time kundër Meksikës. Kjo lojë më ka dhënë më shumë besim dhe unë shpresoj që të luaj edhe më mirë në ndeshjen e ardhshme”.
Belgjika: “Ne e dimë se do të jetë një lojë shumë e vështirë, për shkak se Belgjika është një ekip i madh, jo më kot gjendet në çerekfinale. Ne jemi përgatitur shumë mirë, por i njohim ata. Gjithashtu, jemi duke i studiuar në detaje, për të gjetur mënyra të duhura kundërpërgjigjeje. Belgët kanë cilësi dhe ndeshja do të jetë e vështirë”.
