Tani që merkatoja u mbyll, Interi përqendrohet te Serie A, ku të dielën do të luajë në transfertë kundër Sassuolo-s. Trajneri Luciano Spalletti nuk do të ketë të gatshëm Radja Nainggolan-in, por do të hedhë në fushë blerjet e reja. Sigurisht që Lautaro Martinez nuk do të mungojë. Tekniku i zikaltërve flet për pritshmëritë që ka për sezonin e ri.
“Ne duhet që të tentojmë të fitojmë të gjitha ndeshjet, duhet këmbëngulje dhe vazhdueshmëri. Vijmë pas një kampionati të rëndësishëm, e këtë vit kemi detyrë të përmirësohemi. E donim këtë biçikletë, tani të pedalojmë siç duhet.”
Tekniku u ndal te rivali i parë.
“Sassuolo është një kundërshtar i fortë, e kemi parë në ‘San Siro’ së fundmi. E dimë forcën e kësaj skuadre. Por ne duhet të jemi të mirëkolauduar, nuk na duhen teste të tjera. Duhet të jemi gati të fitojmë të gjitha takimet. Gjendja e ekipit është e mirë. Kemi bërë çfarë duhej që të bëhej. Mund të tentojmë të fitojmë ndaj çdo rivali. A kam ekip më të fortë se viti i shkuar? Po, veç afrimeve, kam një ekip që e njeh më mirë veten.
I pyetur nëse Interi i tij është skuadra që mund të thyeje Juven, Spalleti përgjigjet:
“Duhet të luftojmë, vetëm nëse doni t;ia jepni titullin Juves pa luajtur fare. Ka ekipe që mundt a fitojnë titullin. Të gjithë jemi përmirësuar. Juvja është ekipi më i fortë nga të gjithë, pastaj janë 5 ekipe që mund të luftojnë deri në fund. Ne jemi ndër këto të pesta, Inter, Roma, Napoli, Lazio e Milan”.
