Ferrari ka dominuar provat zyrtare të zhvilluara sot pasdite në pistën e Monza dhe të vlefshme për garën e Çmimit të Madh të Italisë në Formula 1. Dy pilotët e makinës italiane kanë siguruar dy vendet e para në vijën e nisjes, me Kimi Raikkonen që dha kohën 1’19”119, duke siguruar “pole position” para fansave të shumtë të Ferrarit. Në xhiron e fundit, finlandezi arriti të mposhtë shokun e tij të skuadrës Sebastian Vettel, që u rendit i dyti. Ndërsa në vendin e tretë u klasifikua kampioni i botës në fuqi, Lewis Hamilton me Mercedes. Megjithatë, diferencat mes tri të parëve janë shumë të vogla, çka premton një garë spektakolare nesër në Monza.
Q3 CLASSIFICATION: It's a front row lockout for @ScuderiaFerrari 🔴 #ItalianGP 🇮🇹 #F1 pic.twitter.com/Y15EboDNS3
— Formula 1 (@F1) September 1, 2018
Në përfundim të sesionit të parë të provave zyrtare u eliminuan Perez (Force India), Leclerc (Sauber), Hartley (Toro Rosso), Ericsson (Sauber) dhe Vandoorne (McLaren), ndërkohë që më i shpejti në pistë ishte Vettel me Ferrari. Ndërsa në përfundim të sesionit të dytë u eliminuan pilotët Magnussen (Haas), Sirotkin (Williams), Alonso (McLaren), Hulkenberg (Renault) dhe Ricciardo (Red Bull). Australiani nuk zbriti fare në pistë, teksa nesër garën do ta nisë nga vendi i fundit, pas modifikimeve që ka bërë në makinë, ndërkohë që edhe në këtë sesion më i shpejti ishte Vettel.