Përtej elozheve për trajnerin Gennaro Gattuso dhe opinionit të përgjithshëm që ky Milan ka potencial, është e qartë që kuqezinjtë nuk kanë një skuadër të kompletuar dhe pa llogaritur Juventusin, edhe Interi, Napoli e Roma duken larg.
Për këtë arsye, drejtuesit e Milanit po bëjnë gjithçka për të afruar lojtarë cilësorë dhe një goditje e madhe është bërë, sepse braziliani Paquetá është një lojtar shumë i talentuar, i cili mund të shtojë ndjeshëm cilësinë nga mesfusha e lart.
Nuk mjafton, sepse problemet e Milanit janë edhe në mesin e fushës, ndaj Leonardo e Maldini po kërkojnë një mesfushor të aftë të ndërtojë dhe të dijë të mbrojë. Emri i piketuar prej kohësh është ai i Leandro Paredes, argjentinasit të Zenitit, i cili ka nisur sezonin e dytë në Rusi. Zeniti e bleu nga Roma për 23 milionë euro në verën e vitit 2017, ndaj nuk do të jetë një tratativë e thjeshtë, por Milani shpreson te dëshira e futbollistit për t’u kthyer në Itali.
Ndërkaq, klubi kuqezi po vëzhgon edhe situatën e mesfushorit uellsian Aaron Ramsey, i cili del i lirë në treg verën e ardhshme dhe Arsenali mund ta shesë në janar, për të mos e humbur falas. Gjithsesi, Ramsey është futbollist që ndiqet nga klubet më të pasur në botë dhe Milani në këtë drejtim është në disavantazh të madh.
