Milani e ka seriozisht për Lucas Paqueta. Sipas “Tuttosport”, ka pasur një kontakt të drejtpërdrejtë midis Leonardo-s dhe Eduardo Uram. Ky i fundit është agjenti i talentit të ri brazilian. Gjatë takimit, i cili shërbeu për të diskutuar të ardhmen e klientit të tij, Uram i ka konfirmuar Leonardo-s se Flamengo ka kërkesa të larta financiare për ta lënë Paqueta (të cilin e do edhe PSG) të lirë.
Më konkretisht, klubi brazilian kërkon 50 milionë euro. Një shifër shumë e lartë, sidomos duke pasur parasysh se Paqueta sapo ka mbushur 21 vjeç dhe ende duhet të provojë shumë, pavarësisht cilësive teknike të tij, që nuk janë në diskutim.
Paqueta ndiqet nga Milani prej disa kohësh, por tani që Leonardo është bërë drejtor i kuqezinjve, interesimi është rritur. Në muajt e fundit, Leonardo ka udhëzuar Kaka për të mbajtur kontakte me familjen e djaloshit të talentuar. Pas kësaj, megjithatë, do të duhet të bindet Flamengo, që kërkon shumë miliona.
