Gjashtë të vdekur (2 prej tyre turistë britanikë), disa persona të humbur dhe dëme të pallogaritshme kanë sjellë përmbytjet e ditëve të fundit në Majorka të Spanjës. Një situatë e rëndë krijuar sidomos në komunën e Sant Llorenc, ku qindra persona janë të pastrehë për shkak të dëmeve të shkaktuara nga shirat, rrëshqitja e dheut dhe përmbytjet.
Personazhi më i njohur në botë nga Majorka mbetet padyshim tenisti Rafael Nadal, që ka lindur dhe jeton në qytezën e Monacor dhe ngjarjet e ditëve të fundit kanë prekur pa masë numrin 1 në botë për meshkuj. Ndaj dhe ka vendosur që të ndihmojë në mënyrën e tij personat që janë në nevojë.
Përmes një mesazhi në “Twitter” të bërë publik sot, Rafael ka deklaruar se dyert e Akademisë së tij janë të hapura për të mirëpritur të gjithë personat që nuk kanë një shtëpi, duke u ofruar fjetje dhe ushqim. “Kjo është një ditë e trishtuar për Majorkën dhe shpreh ngushëllimet e mia për familjarët e viktimave. Monacor është shumë pranë Sant Llorens, ndaj vendosëm të hapim dyert e “Rafael Nadal Academy” për të mirëpritur të pastrehët dhe ata që kanë nevojë për një vend për të qëndruar”, shkruan Nadal.
Día triste en Mallorca. Mi más sincera condolencia a los familiares de los fallecidos y heridos por las graves inundaciones en San Llorenç. Tal y como hicimos ayer volvemos a ofrecer hoy las instalaciones de @rnadalacademy para todos los afectados que necesiten alojamiento
— Rafa Nadal (@RafaelNadal) October 10, 2018
