Eshtë mbyllur në barazim pa gola ndeshja në “Anfield Road” mes Liverpool dhe Manchester City dhe tanimë kur janë luajtur 8 javë, tre ekipe ndajnë kreun e Premier League me nga 20 pikë: Liverpool, Manchester City dhe Chelsea. Arsenal dhe Tottenham kanë dy pikë më pak.
Edhe pse të dy ekipet janë të prirura drejt futbollit sulmues, në pjesën e parë u bënë vetëm tre goditje drejt portës kundërshtare, më pak se në çdo sfidë tjetër të kampionatit anglez në këtë edicion. Në pjesën e dytë gjërat ndryshuan disi, por gjithsesi mungoi goli.
Mundësinë më të mirë për të vendosur ndeshjen e pati Ryiad Mahrez, pesë minuta para fundit të ndeshjes, por sulmuesi algjerian humbi penalltinë e akorduar për faullin që Van Dijk shkaktoi ndaj Sane.
Goditja e Mahrez nga pika e bardhë përfundoi mbi portën e mbrojtur nga Alisson. Kësisoj, Manchester City nuk arriti të fitojë për herë të 17-të radhazi në fushën e Liverpool, ku suksesi i tyre i fundit daton në vitin 2003.
Nga gjashtë penalltitë e fundit të ekzekutuara nga Mahrez, ai ka humbur katër. Të dyja këto ekipe nuk e kanë provuar ende shijen e humbjes në këtë kampionat.
