Historia mes Daniele De Rossit dhe Romës vazhdon. Sipas një raporti të “Corriere dello Sport”, rinovimi i kapitenit me klubin verdhekuq është vetëm një formalitet dhe ndoshta do të zyrtarizohet në fillim të vitit të ardhshëm.
Kontrata aktuale e tij do të përfundojë në vitin 2019, por, ashtu siç ishte parashikuar nga De Rossi dhe Monchi verën e kaluar, për rinovimin nuk do të ketë asnjë problem. Mesfushori do ta veshë fanellën e Romës të paktën deri në vitin 2020.
Marrëveshja e re nënkupton pagë më të ulët, në krahasim me 4 milionë eurot që fiton sot, shumë që mund të rritet falë shpërblimeve, që lidhen me aktivizimin e tij në ndeshje. De Rossi është ende një pikë referimi në formacionin e Romës, të paktën deri më tani, pavarësisht nga disa probleme fizike që lidhen me moshën (35 vjeç i mbushi në korrik).
Ai ka luajtur vetëm 20 minuta më pak se e njëjta periudhë e sezonit të kaluar. Edhe blerja e Nzonzi nuk e ka ushtëzuar kapitenin për të qenë pjesë e formacionit bazë të kryeqytetasve. Sidoqoftë, De Rossi nuk është i vetmi rinovim në axhendën e Monchi. Drejtori sportiv ka filluar të merret edhe me rinovimin e mundshëm të boshnjakut Edin Dzeko, kontrata e të cilit skadon në vitin 2020.
