Divorci mes “Zonjës së Vjetër” dhe Beppe Marotta-s ka befasuar të gjithë tifozët e Juventus. Marotta ka qenë arkitekti i skuadrës që po dominon në Itali prej tetë vitesh, pa harruar dy finalet e luajtura në Champions League. Tani kanë filluar të qarkullojnë shumë zëra në lidhje me arsyet e largimit të tij.
Sipas “Rai Sport”, Marotta nuk ka qenë dakord me shitjen e Mattia Caldara-s te Milan. Qendërmbrojtësi italian u transferua në Milano për 25 milionë euro verën e kaluar pasi luajti vetëm një miqësore me bardhezinjtë. Juventus vendosi ta shiste Caldara-n te Milan në këmbim për Leonardo Bonuccin dhe, sipas “Rai Sport”, ish-administratori i deleguar i Juventus nuk ka qenë dakord me vendimin e klubit.
Sipas mediave të tjera sportive në Itali, Marotta nuk ka qenë dakord me blerjen e Cristiano Ronaldo-s dhe as shitjen e Gonzalo Higuain. Për shkak të këtyre mosmarrëveshjeve me presidentin Agnelli, dyshja ka vendosur të ndahet.
Zërat e fundit flasin për një transferim të mundshëm të Marotta te Manchester United ose Milan. Drejtuesi nuk do të jetë i vetëm në aventurën e re, duke parë se pritet të ketë në krah Antonio Conte-n.