Dashamir Xhika do të ketë rastin nesër, në transfertën vlonjate, për të vënë “tullën” e tij në sezonin mbresëlënës të Partizanit deri tani, që si pikë referimi ka titullin kampion. Në mungesë të Alban Hoxhës së dëmtuar, portieri i dytë i të kuqve, që djersin përditë në stërvitje, thirret në “apel” nga trajneri Skënder Gega. Për t’i dhënë zemër, natyrisht, e kishte marrë me vete në konferencën e sotme për shtyp. Xhika iu përgjigj kështu pyetjeve të gazetarëve:
“Te Partizani kam vite dhe e njoh mirë ambientin. Është e vërtetë, këtë sezon duket ndryshe nga herët e tjera. Profesori nuk na vë në presion për rezultatin. Kam që i vogël në këtë klub dhe shpresoj ta mbyll këtu karrierën.
Në Vlorë më jepet rasti të luaj sërish. Do mundohem të shfrytëzoj eksperiencën që kam dhe stërvitjen e mirë, që e bëj përditë njësoj si Albani. Zgjedhje e dytë gjithmonë te Partizani? Kjo nuk përbën problem për mua. Nuk kam pse të largohem, këtu jam në shtëpi. E përsëris, nuk është problem që jam portier i dytë.
Derbi me Tiranën? Ne jemi të fokusuar vetëm te Flamurtari. Unë mendoj për nesër, kur do të jem në fushë. Derbi është javën tjetër. Ndeshjet merren me radhë”.
