Është padyshim një prej momenteve më të vështira dhe kaotike të Manchester United, por pavarësisht problemeve dhe krizës së skuadrës nën drejtimin e trajnerit Jose Mourinho, mbrojtësi Chris Smalling ka nënshkruar një kontratë të re, që do ta mbajë të lidhur me klubin e “Djajve të Kuq” deri në vitin 2022. Kushtet e reja të porsa firmosura nga mbrojtësi veteran tashmë në “Old Trafford” përfshijnë edhe opsionin e një shtese prej 12 muajsh të tjerë. Një marrëveshje e re për 29-vjeçarin që nënkupton se në vitin 2020 ai do të tejkalojë eksperiencën e tij 10-vjeçare në “Old Trafford”.
Smalling është bashkuar me “Djajt e Kuq” që kur u transferua nga Fullham në vitin 2010, në një transaksion që kishte edhe bekimin e trajnerit legjendar Sir Alex Ferguson, në janarin e atij viti. Mbrojtësi ka regjistruar mbi 300 aktivizime me klubin dhe shpreson që të regjistrojë edhe shumë të tjera. “Ky është sezoni im i nëntë me klubin dhe jam shumë i lumtur që do të vazhdoj progresin tim me këtë klub. Është një nder i vërtetë të luaj për Manchester United dhe ne tashmë jemi të gjithë të përqendruar në kalendarin shumë intensiv të periudhës festive”, deklaroi Smalling.
