Maurizio Zamparini e ka shitur përfundimisht Palermon dhe ia ka dhuruar një kompanie në Londër për vetëm 10 euro, ka lajmëruar klubi i Serisë B italiane.
Prej të premtes në mbrëmje biznesmeni 77-vjeçar nuk do të jetë më pronari i klubit siçilian, ndërkohë që nuk dihen detaje mbi pronarët e rinj.
Klubi italian ka publikuar edhe një letër të hapur të Zamparini-t për tifozët palermitanë.
“Duke menduar për të ardhmen e klubit dhe për tifozerinë palermitane, me dhimbje kam firmosur daljen time nga pronësia e klubit. Objektivi i vendosur prej kohësh ishte gjetja e biznesmenëve të aftë të vijonin punën time, por me potencial më të madh ekonomik, pasi për këtë klub duhen investime të mëdha, që unë nuk isha më në gjendje t’i bëja.
“Përveç Palermos, që e kam shitur për vetëm 10 euro, u kam shitur pronarëve të rinj të klubit edhe shoqërinë Mepal, me pronarët e rinj që do të shlyejnë 22.800.000 euro, shifër që do të kalojë në arkat e klubit. Pronarët e rinj do të ndërmarrin aktivitetet e duhura për të ndërtuar stadium dhe një qendër sportive, projekte të aprovuara nga bashkia”.
Zamparini ka qenë edhe president i Venezia-s, para se të merrte Palermo-n, ndërsa në Itali njihet dhe do të mbahet mend si një president absurd, i aftë të ndryshojë 54 trajnerë që prej sezonit 1987-88, kur u bë president i Venezia-Mestre. Plot 51 ndryshime gjatë sezoneve, një rekord i çmendur, me një mesatare prej 3 muajsh e gjysmë (14 ndeshje) muajsh si jetëgjatësi për çdo trajner që është punësuar nga Zamparini.
