Trajneri i Liverpool, Jurgen Klopp ka shfaqur sot interesin e tij për të sjellë në Premier League lojtarin belg Thorgan Hazard, i cili luan në Bundesliga me skuadrën e Borussia Moenchengladbach. Thorgan është vëllai i Eden Hazard, luan si anësor krahu dhe pavarësisht se është më pak i njohur se fantazisti i Chelsea ka patur mjaft oferta kohët e fundit, përfshi edhe atë të Liverpool.
Lajmin e ka konfirmuar e poërditshmja britanike “Daily Star”, sipas së cilës lojtari nuk ka në plan të rinovojë kontratën me ekipin gjerman, e cila skadon në verën e vitit 2020. Për këtë arsye, skuadra e “reds” ka gati një ofertë prej 34 milionë eurosh për ta “rrëmbyer” lojtarin nga ekipi i Moenchengladbach dhe ta sjellë në Premier League që në janar.
Ideja e Klopp është ta marrë lojtarin në formë huazimi deri në fund të këtij sezoni dhe më pas, nga 1 korriku, lojtari të bëhet 100% i Liverpool, duke blerë tërësisht kartonin e Thorgan Hazard. Trajneri gjerman e konsideron si të përshtatshëm mesfushorin 25-vjeçar, ndaj shpreson ta ketë në dispozicion që në merkaton e janarit.