Partizani doli me humbje nga miqësorja e tretë në tokën turke, këtë herë ndaj Dinamos së Zagrebit. Përballë ekipit gjigant kroat, “demat” e Gegës u mundën me përmbysje, në shifrat 2-1.
Që në minutën e 11-të, shënoi i përhershmi Bardhi në këto miqësore në Turqi, i cili kaloi të kuqtë në avantazh pas një goditje vrastare brenda zonës.
Një episod jo i këndshëm në minutën e 20-të, ku Telushi i dëmtuar, detyrohet të lërë fushën e lojës, ndërsa para përfundimit të pjesës së parë, doli edhe një prej afrimeve, Dilaver Duka, duke mos përfunduar as 45 minutat.
Ndërkohë, Dinamo barazoi shifrat në minutën e 28-të, ku Moro çoi topin në cepin e portës së Alban Hoxhës. Me fillimin e të dytës, ekipi nga Zagrebi shënoi edhe golin e dytë, me Petkoviç, i cili me një devijim të lehtë mposhti Alban Hoxhën.
Në të dytëm, pati minuta për Mensah, Koten, afrimi i ri Rexhepi, por deri në fund shifrat mbetën të pandryshuara dhe “demat” e mbyllën me humbje.