Manchester United është tronditur nga lajmi se Paul Pogba mund të mungojë në sfidën ndaj Paris Saint-Germain.
Mesfushori do t’i nënshtrohet skanimeve të kofshës pasi thuhet të ketë pësuar një tërheqje muskulore ndaj Burnleyt.
Francezi ka dalë nga fusha duke çaluar pas barazimit 2-2 ndaj ekipit të Dyche.
Ai kërkoi të trajtohej nga stafi mjekësor në dhomën e zhveshjes, por është e paqartë se në cilën pjesë të ndeshjes e ka pësuar dëmtimin.
Ishte penalltia e tij në minutën e 87-të që i dha mundësinë Djajve të rifuten në lojë, teksa Lindelof në fund të takimit ka anuluar avantazhin e dyfishtë të miqve.
Pogba ka qenë lojtari kyç i United që pas uljes në stol të Ole Gunnar Solskjaer. Ai ka shënuar gjashtë gola si dhe ka përgatitur katër të tjerë në tetë ndeshjet e fundit.
Sipas anglezes Metro, United duhet të presë rezultatet e skanimeve për të parë se për sa kohë do të qëndrojë larg fushave kampioni i botës.
