Pep Guardiola foli në një konferencë shtypi për lirimin e përkohshëm nga burgu të Sandro Rosell, ish-presidentit të Barcelonës, pas fitores së Manchester City kundër West Ham. Trajneri katalanas tha se e kishte pritur mirë këtë lajm: “Unë jam shumë i lumtur për Sandro Rosell dhe familjen e tij. Nuk jam gjyqtar dhe prokuror, nuk i kuptoj mirë ligjet, por është shumë e vështirë për të kuptuar se si një person qëndron dy vite në burg dhe një ditë, pas gjykimit, lirohet përkohësisht”.
Guardiola e ka krahasuar gjendjen e Rosell me atë të politikanëve katalanas, që kanë mbetur në burg, vetëm pse kërkojnë pavarësinë e Katalonjës: “Situata e tij është e njëllojtë si ajo e të burgosurve politikë, që akuzohen për kryengritje dhe rebelim, krime që nuk i kanë kryer. Si mund të shkojnë në burg edhe njerëz si Jordi Cuixart, apo Jordi Sánchez, të cilët nuk janë as politikanë?!”
